Aafgelaupe moandig (20 oktober) begos de hirfsvakantie veur al die luu waat nog nao sjooal gaon. Veur Thei woor det weer ins de meugelikheid om, wie ut eine ras-echte Moferter jong betaamp, biej häör eige en biej ziene oome op ut landj te wirke. Hae haet der drek mer ein sjooan fotoreportaasj van gemaak (Euverigens kump der daodoor zellef neet oppe foto's, concequentie van ut zellef maake van die foto's).

Smorges ging der ieës ut krooatelandj callefaatere, zoadet dit landj der weer
ideaal biej loog veurre wintjer. Ut hej gevroare snachs, dus noa ieës ff de roete
iesvriej te höbbe gemaak kos hae vertrikke mit de FORD 6710 (85 PK) en callefaater.

Hiej is der aangekomme oppe plaats van bestumming: Hoabert, urges tusse Mofert en Berg.

Iës de callefaater de grondj in trikke, zoadet der de rol omhoag kint zitte. Zoa drûk
die neet ut landj aan, maar blief ut oape ligke zoadet de grondj baeter oamp!

Nog effekes doorwirke en den is der vaerdig mit dit landj.

Smiddes maar ins de miskoel laeg vaare, die zit good vol!

Mit dit laadsjupke leutj ter zich steeds de kieper vol.
(laadsjupspecs: Kramer Allrad mit eine Deutz 3 cilinder motor en 70 pk)

De iëste kieper vol gelaaje, kloar om mit noa ut veldj te vaare en doa op te kiepe!
(trakterspecs: eine Fiat 580 DT, mit 58 pk)

Op ut veldj aangekomme.

Iës de deure oape maake en vashange natuurlik.

Vervolges omhoag mit de kieper, hiej kump natuurlik hiël get vakbekwoamheid biej kieke.

Effe veuroet vaare en laeg is de iëste waage!

Noa ein paar keer flink sjuppe begos de koel al aardig te slinke!