15 september 2003
Van ooze correspondent ter plaatse.
Zunjig 14 september woor het zoa
wiet. Vandaag zow de beslissing valle in het perseunlik kampioensjap
van het verenigingssjeete van Mofert 2003. Om stip 2 oer stonge
Thei en ongergeteikendje aan het sjeetterrein kloar om aan te
vange mit het sjeete. De sjutterie hej helaas gein raekening der
mit gehaaje det om 2 oer auch de formule 1 begindj. Die van Mofert
zeen toch nog altied gaer dae Verstappe effe het halve veldj weer
inhoale inne iearste boch. De opkoms woor doadoor dus neet ech
denderent en beslaote waerde om toet half 3 te wachte op get mieë
man. Det hej resultaat. Naodet Jan van Mans vanne Zandj om efkes
veur half drie auch uns kwoom aanzitte koste ver beginne. Twee
man hejje zich biej de kaerels aafgemeldj (Joost dus en Wil van
Mans) en twee vrouwluu (Helga van Coene en Marlies van Coene).
Ongergeteikendje mog beginne. Nao
zorgvuldig te höbbe aangelag volgde de iearste sjeut en vloog
het bölke eweg. Ein good begin dus. Helaas mog het neet zoa
zeen want biej de daoropvolgendje sjeut bleef het bölke sjtoan.
Det woor dus al sjnel aafgelaupe. Perongelök aanne trikker
gekomme of neet, der woor gein pardon en Abe woor droet. Dan uns
kieke of Thei het baeter deej. Dae woor de volgendje dae mog aanligke.
Het kos waal inne sjterre gesjreeve staon, want auch Thei raakdje
de iearste sjeut en misde de tweede. Dao woore alle Spatze al
nao de ieëste runj droet! Gein succes dus. Ze hoofde zich
gelökkig neet te deep te sjaame, want de winnaar van veurig
jaor, Jan van Mans vanne Zandj, misde auch al in de iearste runj.
Det woor toch ein grooate verrassing.
Bleeve dus nog 4 man euver (en twee
vrouwluu). Nao ein runj of 4-5 misde Mia van Coene en hejje ver
al eine winnaar biej de vrouwluu, namelik Marion van Mans. Taenge
deezen tied misdje Ron van Mans auch en bleeve der nog drie man
euver. Tristan van Maosse heel het lang volle. Det is ech ein
talend wo de sjutterie mer uns achteraan mot gaon. Dae jong is
ein jaor of 17 en sjuut de sjterre vanne hemel. Helaas veur hem
woor hae de volgendje dae misde.
Bleeve dus nog 2 man euver. Jan van
Mans van het veetransport bedrief en ooze enige echte (ex-)Greuninger
Marten Hut. De mèn woore inmiddels op klein bölkes
aan het sjeete, mer det maakde die nieks oet. De bölkes vlaoge
der allemaol van aaf. Oeteindelik nao 83 sjeut (de man) veel de
beslissing. Jan van Mans woor de man dae ein bölke leet sjtaon.
Fantasties gesjaote door allebei de mèn, mer de euverwinning
ging dus nao aspirant-sjutterie lid Martin Hut. Volgend jaor kin
der zien kunste laote zeen biej het echte werk es der lid is vanne
sjutterie. Missjien eine man drèk veur het A-zèstal?
Is Mofert drèk eine outsider veurre OLS-titel van 2004.
Marten zien deilnaame hing euverigens
nog aan ein zieje dräötje, omdet der iears neet ins
zow zeen gekomme. Hae woor namelik nao Greuninge gewaes en hej
zien Henriette (zien vrouw) weite te euvertuuge om get eerder
truuk noa hoes te gaon. Smorges om half illef vertrokke en smiddes
om half 2 toes. En toen drèk aantraeje biej de sjutterie.
Onger het genot van de neudige flesse
beer waerde de prieze oetgereik en bleef het nog waal effe gezellig
in het sjuttelokaal. Volgend jaor weer ein nuuj poging. Missjien
det van danne wiejer komme.
Abe
