Mit dank aan ozze correspondent René Theunissen kinne ver uch uns unne daag oet haet laeve van eine Linner vrachwaagesjauffeur laote zeen.

Moandigmurge half neege sjtuurtj Beun mit vaste handj eine truck van Linne Transport BV noa de veiling in Grubbevors.

Joep Beunen zit dan al ein paar oer inne veilingzaal om doa de bèste paprikaas, tomaate, beunkes,sjampions, poor, besse etc. etc. op te kaupe om de drie trucks vanne firma Beunen vol te kriege zoadet die de waeg op kinne.

Om tieën oer is de veiling gedoan en waere de vrachwaages noa de gooj loads gereeje om zo sjnel meugelik vol gelaaje te waère.

Sjaak Beunen is drök bezig om ziene truck auch op de gooj meneer vol te kriege. Greunte en fruit waat ze het iëste mos aafleevere mosse natuurlik neet gans veuraan in diene wage höbbe stoan.

De wage is vol en veer goan op waeg noa Barendrecht (biej Rotterdam) en Westerlee (biej Den Haag)
Om half twiè staon ver bie de iëste grooathanjel in Barendrecht.

In Barendrecht motte ver op drie plaatse losse en in Westerlee nog op twiè. Bie de lèste grooathanjel komme ver truck nummer drie van de firma Beunen taege. Het is ongerhandj half veer es Beun noa de toesbasis belt:"Laeg in Westerlee". Joep haet intusse gekeeke of der auch retourvrach is. Doaveur motte ver nach noa Breda.

Noa Breda kinne ver weer op hoes aan. In Gilze mot biej waere getenk. Bienoa driehongerd liter diesel der bie en de tenk is weer vol. Om half ach stoan ver weer in Lin op de parkeerplaats aanne Brachterwaeg, en höbbe veer veerhongerdvieertig kilomaeter drop zitte.
En zoa hiltj de firma Beunen die Hollenjers toch mer sjooan aan ut aete.